Bangladesh zirlaiten nawrh titawp

Bangladesh zirlaiten traffic law khauh leh him zawk siam phuta ni kua zet nawrh an huaihawt hnuah Thawhlehni khan nawrh an titawp ta.

Dhaka khawpuia bus chak taka tlanin zirlai pahnih a chilhlum avangin zirlaite hian traffic law him leh khauh zawk siam phutin nawrh an huaihawt zui a ni. Nawrh huaihawt chhunga zirlaite leh police-te innawr buaina avangin mi 150 chuangin hliam an tuar a ni.

Zirlaite chuan Prime Minister Sheikh Hasina kaihhruai sorkar chu transport law khauh zawk siam tur leh, driver fimkhur lote laka khauh taka hremna lekkawh turin an phut a ni. Sorkar pawhin road safety law thar pawm a, motor khalh fimkhur loh vanga midang nunna latu driver-te thi tura hremna pek theihna tur dan chungchang pawh ngaihtuah a tiam bawk a ni. Zirlaite hian nawrh an huaihawt chhung hian Dhaka khawpuia car leh bus driver-te licence te pawh an endik sak zui bawk.

July 29 aṭanga nawrh huaihawt hi school, college leh univeristy zirlaiten an thlawp a, ni kua zet class pawh an neih chhunzawm theih loh hnuah nawrh titawpin zirlai pawh an chhunzawm ve leh nghal a ni.