Nigeria ramah misual kut tuar mi 200 chuang thi

Nigeria sipaite'n helpawl tawmbuk air strike hmanga an beih hnu lawkah, hmarthlang lama Zamfara state khawmite chu hel rual hian phuba lakna kawng khat atana bei letin, khawchhung mi 200 chuangin nunna an chan tih tualchhung mite chuan Inrinni khan an sawi.

State sorkar chuan inbeihna a thlen chhung hian mi 58 chu thah an nih thu a sawi.Tualchhung mite chuan Inrinni khan ruang hi hmunkhatah an zalh khawm vek tih an sawi a ni, an ti.

Pawikhawihna hmuna a nupui leh a fa pathumte chanta, Ummaru Makeri chuan inbeihna a thlen chhung hian mi 154 vel bawrte ruang chu phum an nih thu sawiin, tualchhung mipuite chuan nunna chan hi a tlem berah mi 200 vel zet an nih thu an sawi.

Hetihlai hian karliamta Thawhlehni khan hel rualte chuan bike hmangin Anka sorkar area huamchhunga awm Zamfara-a chengte chu silaiin an tawngpawng kah a, mi 30 vel an thi tih Reuters chuan a tarlang.

Sipaite chuan Thawhṭanni khan Gusami ramhnuai leh Zamfara state-a Tsamre khawthlang ramah air strike an neih thu sawiin, hetah hian suamhmang mi 100 chuang chu an thih thu leh an zingah hian an hotu pahnih pawh an tel tih an sawi.

Nigeria khawthlang lamah hian inbeihna a chhuak fo a, kum 2020 hnu lam khan mihring rukbo leh pawikhawihna lian tham tak tak a thleng fo ṭhin bakah, sorkar pawhin dan leh thupek kenkawh kawngah harsatna an tawh phah nasa hle ani.

Nigerian khawthlang lama Kebbi state-a college zirlai 30 an rukbo te chu karliamta Inrinni khan chhuahtir an nih thu Kebbi governor chuan a sawi.

President Muhammadu Buhari chuan sipaite'n pawikhawihna hrang hranga inhnamhnawihte leh tihluihna hmanga vantlang mipuite hnena pawisa lo khawn ru ṭhin misual rual te chu ti rema, do let turin ralthuam ṭhahnem tak an chawlut tawh a ni.

"Mipui pawisawi lote chunga tharumthawhna thleng hi pawisak nei tawh lo khawpa beidawng tawh phuba lak tumna a ni. Tunah chuan kan sipaite'n an beilet ve tawh ang" tiin Buhari chuan a sawi.