UK sorkar adviser te'n vaccine dose lina pek rawt

United Kingdom-a sorkar adviser te chuan data aṭanga vaccine dose thumnain damdawi-ina panpui ngai engemaw china an tlakhniam phah avangin nursing home a chengte leh kum 80 chin chunglamte tan Covid-19 vaccine dose lina pekchhuah ṭha an tih thu an sawi.

Kum 65 chunglam dose thumna an lak aṭanga thla thum liam tawhte zinga damdawi-ina dahluh ngai chu hri kai zinga 10% chiah an nih thu sawiin, natna benvawn leh taksa chak lote erawh dose lina pek tumna a awm rih lo tih U.K. Health Security Agency data chuan a tarlang.

Britain-ah Covid-19 vanga thi 1,50,000 chuang awm tawh
Britain-ah coronavirus kaihhnawih vanga thi mi 313 awm belh lehin, ramchhungah Covid vangin mi 1,50,000 chuang an thi tawh tih official-te chuan Inrinni khan an tarlang.

Inrinni khan coronavirus kai thar mi 1,46,390 awm belh lehin, ramchhungah hri kai mi 14,333,794 an awm tawh a ni.

Britain sorkara advisory scientist Professor Andrew Hayward chuan Covid vanga thi mi 1,50,000 chuang an awm chu a lungchhiat thlak takzet a ni, a ti.

"Hei ai hian kan ti ṭha thei in ka hria. Hri leng thawh khatna leh thawh hnihnaah khan inbuatsaihna ṭha chu nei ilang thihna tamzawk hi chu kan pumpelh theih ka beisei a ni" tiin University College London academic Hayward chuan a sawi.

Britain hi United States, Brazil, India, Russia, Mexico leh Peru dawta hri vanga thi 1,50,000 chuang awmna ram pasarihna a ni.