US in a hrekna chungchangah North Korea lawm lo

North Korea chuan US in hrekna siam belh a tum nia thuchhuah a siam chu an lawm lo hle tih an sawi.

N. Korea Foreign Ministry thuchhuah chuan US in thu hlui tawh tak a buaipui reng a nih chuan nuclear ralthuam tihbona kawngah hma an la chhunzawm dawn lo tih an sawi a ni. US palaite chu President Donald Trump-a duhdan pela cheah an puh bawk a, Singapore-a an inbiakna boruak tichhe zawnga hmalaah an puh a ni.

Trump leh N. Korea hruaitu Kim Jong-un-te hian June thlaa meeting an neihah khan Korean peninsula-a nuclear ralthuam tihbo an lo remti tawh a ni.

Singpore summit-a an inremns siam hi mumal taka tlangzarh a la ni lo a, N. Korea hian vawilehkhata an nuclear ralthuam nuaibo vek hi an tum hran lo niin a lang a, UN chuan nuclear programme hi N. Korea hian an la kalpui reng tih a sawi bawk.

US chuan N. Korea hian a nuclear program hi a tihtawp lo a nih chuan a hrekna pawh a titawp dawn lo tih a lo sawi tawh a, hrekna a siam belh zawk dawn tih a lo sawi tawh a ni.

North Korea's foreign ministry chuan Ningani khan US chuan ram pahnih inbiaknaa inremna an siam te an pawm duh loha thu hlui tawh tak an pawm reng a nih chuan an nuclear programme pawh an titawp dawn bik lo tih an sawi a, US hruaitu hmasa te pawh hemi kawngah hian an lo hlawhchham fo tawh tih an sawi bawk.

Tunkar tirah khan N. Korea foreign ministry chuan US chetdan chu mak a tih thu leh misual rual chet dang ang maia cheah a lo puh tawh a ni.