Costa Rica SC-in mahni anpui inneih khapna dan dodal

Costa Rica Supreme Court chuan sorkarin mahni anpui inneih a khap chu ram danpui kalh a nih thu leh inthliarhranna a nih thu a sawi.

Court chuan ram dan siamtute chu thla 18 chhunga he dan hi thlak leh turin thupek a pe bawk.

Costa Rica President Carlos Alvarado Quesada chuan Court thuchhuah chu a pawm loh thu sawiin, tumah an nihna avanga thliarhran an nih loh tur thu a sawi. Hetiang hi ni mah se Costa Rica-a dan siamtu tam tak hi evangelical, mahni anpui kawp leh inneih na taka dodal tute an ni thung.

Supreme Court judge, Fernando Castillo chuan Nilaini khan dan siamtu lamin hma la lo mah se thla 18 hnuah chuan tihtawp a ni dawn tho tih a sawi.

Costa Rica legislative chamber seat 57 awm zinga seat 14 luahtu hi evangelical member an ni.

Hetihlai hian Nilaini zan rei tawhah khan sorkar lam chuan January-a Inter-American Human Rights Court in signatory member zawng zawng in mahni anpui inneih phalna chu an pawm tur a ni a tih chu an pawm thu an sawi.

Ramchhunga gay legislator hmasa ber Enrique Sanchez chuan assembly in anmahni chuan dan hi an thlak a rin loh thu a sawi. Sanchez hi President Carlos Alvarado kaihhruai Citizen Action Party mi a ni nghe nghe.

Carlos Alvarado hian April thlaah khan president dinhmun hi a luah a, mahni anpui inneih phalsak a campaign au hla pakhat a ni a, hemi avang hia LGBT-te vote pawh a hmu ṭha hle. Alvardo hi rock singer hlui leh novelist a ni a, evangelical pastor Fabricio Alvarado hnehin President dinhmun hi a luah a ni.