Saudi Arabia airstrike-ah Yemen naupang thi hnem

Saudi Arabia-in thlawhtheihna hmanga an beihnaah Ningani khan Yemen naupang eng emaw zat an thi tih Houthi-controlled Health Ministry chuan a sawi.

Heng naupang te hi field trip-a chhuak an ni a, bazar-a an chuanna bus a din laiin airstrike hian a fuh ta niin an sawi a, mi 50 an thih bakah hliam 77 an awm tih a sawi bawk.

Naupang thi tam zawk hi bus chhunga chuang lai an ni.

International Committee for the Red Cross chuan Saada-a an damdawi-in ah naupang ruang 29 an dawn thu leh heng naupang te hi kum 15 hnuailam an nih tlangpui thu an sawi a, hliam 40 an buaipui thu leh heng zinga 30-te hi naupang an nih thu an sawi.

Saudi lam thupuangtu Col. Turki al-Malki chuan missile chu kahchhuah chuan phalna hmun bik kahfuh an tum thu a sawi a, naupang bus-a chuang te chu an bitum an nih loh thu a sawi.

Saudi lam chuan airstrike chu phalna neia military operation an kalpui a nih thu sawiin, Nilaini zana Jizan province bituma Houthi ballistic missile an ram lama kahchhuah chhanna a nih thu an ram official news agency chuan an tarlang.

Saudi Press Agency chuan al-Malki thusawi a tarlanah chuan a hma zana Jizan missile hmanga beih a nih ṭum pawhin thi leh hliam an awm nual thu a sawi tih an ziak a ni.

Yemen-a UN huma­nitarian coordinator Lise Grande chuan buaina chu dawhkanah chinfel a hun tawh tih sawiin thi leh hliam an awm belh zelh avangin inremna kawng zawng a hun tawh a ni, a ti.