Tlang hri leng angin Covid hi ngai ula, booster pek zawhah vaccine semchhuah titawp rawh u : UK vaccine expert

UK-a vaccine task force chairman hlui Dr Clive Dix chuan booster dose campaign zawhah chuan mi nawlpui tana Covid-19 vaccine semchhuah chu titawp tur leh Covid-19 chu tlang hri leng anga ngai tawh turin Britain sorkar a ngen.

"Booster hi kan mamawh anih chuan natna benvawn neite leh taksa chak lote a veng ṭha em tih kan zirchiang tur a ni. A huhoa vaccine semchhuah hi UK-ah chuan kan titawp tawh tur a ni" a ti.

Vaccine expert chuan sorkarin coronavirus darh tur ni loin, hri hi thunun a tum zawk tur ani a, vulnerable group-ten harsatna an tawh lohnan hma an la tur a ni, a ti.

UK health security agency (UKHSA)-te chuan karliamta Inrinni khan Covid-19 kai thar mi 1,50,000 dawn an hmuchhuak tih an puang. Europe ram zingah Russia dawta hri kai hmuhchhuah tamberna a ni mek a ni.

Hetihlai hian Britain prime minister Boris Johnson chuan "Coronavirus hian ramchhungah manganna nasa tak min rawn thlen a, vawiin thlengin thihpui mi 1,50,000 chuang an awm tawh a ni" tiin twitter kaltlangin a sawi.

Test aṭanga hri kai emaw inkhunghran ngai emaw an ṭhahnem em avangin defence ministry chuan Zirtawpni khan sipaite chu damdawi-ina hnathawkte pui turin an thawnchhuak tih an sawi.

Damdawi-ina dah ngai leh thihpui erawh hri leng thawh khatnaa mipuite'n vaccine an lak hma ai khan a tlahniam tawh hle tih an sawi.

Sorkar hian mipuite chu booster dose la tura ngenin, an ram mipui kum 12 chin chunglam zinga 61% te chuan booster hi an la tawh a, vaccine la ve lo te pawh vaccine hi la thuai turin theihtawp an chhuah a ni.