Kum li dang tang turin Suu Kyi hrem

Myanmar court chuan dan loa inbiakpawhna walkie-talkie kawl ruah leh natural disaster management law chungchangah coronavirus inkaihhruaina a bawhchhiat avangin kum li chhung lungin tang turin Aung San Suu Kyi hremna thupek an tichhuak.

Suu Kyi hi thla hmasa khan thubuai pahnihah thiam loh chantir niin, kum li chhung tang tura hrem a lo ni tawh bawk a, mahse sipai sorkar chuan kum hnih in an tihtlem sak a ni. Suu Kyi thubuai hi an ram khawpui, Naypyitaw-ah media mite biakpawh theih lohin an ngaihtuah a, Suu Kyi lawyer-te pawh hian media leh vantlang mite nen inbiakpawhna neih an khap bawk a ni.

Nobel Peace Prize pawh lo la tawh kum 76-a upa Suu Kyi hian nikum February 1-a Myanmar sipaiten thuneihna an hnehchhuh hnuah thubuai hrang hrang vangin an hreng zui nghal a ni. A thubuaiahte hian thiam loh chantir vek anih chuan kum 100 chuang lunginah hian a tang thei dawn a, Suu Kyi erawh chuan heng an puhnaahte hian tihsual engmah a neih loh thu a sawi ve thung a ni.

Hetihlai hian Suu Kyi lamṭangte chuan sipaite hian lungina an khung theihnan ruahmanna an siam lawk sa tih sawiin, politics lama a kir leh an hlauh vang niin an sawi.

Myanmar sipai hotu Min Aung Hlaing chuan thla hmasa khan Suu Kyi leh President Win Myint te chu an thubuai ngaihtuah chhung chu hmun khatah an dah dawn tih sawiin, lunginah khung an nih loh tur thu a sawi.