Bangladesh-a Rohingya refugee camp a kang Mi 5,000 chuang chenna nei loin an awm

Bangladesh chhim chhak lama Rohingya refugee camp-ah Pathianni khan kangmei nasa tak a chhuak a, mi 5,000 chuang chenna nei loin an awm tih police-te chuan an sawi.

Bangladesh-ah hian Rohingya raltlan hi 8,50,000 vel an awm a, an zinga a tam ber hi kum 2017-a Myanmar sipaite beihpui an thlak avanga tlanchhiate an ni.

Refugee camp-a venhimna hna thawktu, Armed Police Battalion thupuangtu Kamram Hossain chuan kangmei hi Cox Bazar-a Camp 16 aṭanga chhuak ṭan a nih thu sawiin, mau leh tarpaulin hmanga in sak 1,200 vel a kang ral vek tih a sawi.

Bangladesh sorkar official, in-charge refugee Mohammed Shamsud Douza chuan kangmei chhuah chhan hi hriat chian a la ni lo tih sawiin, chhui chian mek a nih thu a sawi bawk.

Nikum March thla khan Bangladesh-a Rohingya refugee camp-ah hian kangmei a lo chhuak tawh bawk a, mi 15 thiin mi 50,000 velin chenna nei loin an awm phah a ni. Pathianni hmasa khan refugee camp-a Covid-19 treatment centre pawh a lo kang tawh bawk.

Camp-a cheng zinga pakhat, Mohammad Yasin chuan fire safety equipment a ṭhat tawk loh avangin refugee camp-ah hian kangmei a chhuak fo tih a sawi. "Tui a awm ṭha lo a, kangmei a chhuah pawhin ṭhelh mai na tur a awm ṭhin lo. Document pawimawh tam tak a kangral a ni," a ti.