Pakistan Parliament member tharte lalut

Pakistan Parliament member thar mi 331-te chu nimin khan rinawmna thu tiam tira lakluh an ni.

Parliament lower house, National Assembly speaker kalchhuak tur Ayaz Sadiq-a kaihhruaiin nimin khan 15th Parliament session hmasa ber neih a ni a, member tharte lakluh an ni. Session hi chawhma dar 10-ah ṭan a ni a, member thar lakluh inkhawmah hian Prime Minister thar tur leh Pakistan Tehreek-e-Insaf (PTI) chairman Imran Khan bakah Pakistan Muslim League-N (PML-N) president Shahbaz Sharif, Pakistan Peoples Party (PPP) chairman Bilawal Bhutto-Zardari leh president hlui Asif Ali Zardari te pawh an tel.

Speaker chuan NA speaker leh deputy speaker thar chu August 15-a thlan a nih tur thu a puang nghal bawk. National Assembly-ah hian seat 342 awmin, heng zinga member 272 chu mipuiten direct-a an thlan a ni a, a bak chu reserve seat a ni thung. Sorkar siam tur hian member137 neih phak a ngai a ni.

PTI chuan speaker atan hian Asad Qaisar an nominate, eptu lam ṭangrualin PPP member Syed Khurshid Shah an nominate bawk a ni.

PTI hi July 25-a inthlanpui neihah khan seat 116 lain party mala seat la hnem ber an ni a, Election Commission-in party te seat lak dan azira reserve seat a semah PTI hi seat 28 pek a ni a, Independent member pakua-in PTI hi an thlawp bawk.

Speaker thar kaihhruaina hnuaiah Prime Minister hi thlan a ni dawn a, PTI chuan PM atan hian Imran Khan an nominate a, eptu ṭangrual ten Shehbaz Sharif hi an nominate bawk. PM thar hi August 18-ah President House-ah lakluh a ni ang. PM thlannaah hian Imran Khan hi tling tur chiang saa ngaih a ni.