Bangladesh hnenah Rohingya-te chhawmdawlna pe lo turin ngen

Myanmar chuan Bangladesh hnenah ram pahnihte inri-naa tangkhang mek, Rohingya Muslim 6000 vel hnena chhawmdawlna a pek ṭhin chu titawp turin a ngen.

Myanmar sipaten nikuma an rama Rohingya te laka beihpui an thlak avang hian mi tam tak chu an tlanchhia a, Bangladesh-a tlanchhe lut hi mi nuai sarih vel an tling tawh nia sawi a ni. Myanmar sipaite chet dan hi United Nations, US leh khawthlang ram hrang hrangten demin an sawisel nasa hle.

Rohingya mi 6,000 vel hi ramri-ah an la tangkhang mek a, heng mite hi Bangladesh ramah an lut duh lo nia sawi a ni. Hei vang hian ram pahnihte inri-naah an awm mek a, Bangladesh hian an mamawh te a pe lut a ni.

Myanmar chuan heng mite dinhmun ngaihtuah hian Bangladeshi Foreign Minister A.H. Mahmood Ali leh Myanmar palai Kyaaw Tinte Swe-te chu kar kalta Zirtapwni khan Myanmar khawpui Naypidaw-ah a inbe tawh niin a sawi. Ramri-a tangkhang mekte hi Myanmar lam aṭanga chhawmdawlna pek luh rawtin, Bangladesh hnenah ṭanpuina a pek ṭhin pawh titawp tawh zawk turin a ngen a ni.

Bangladesh pawhin Myanmar lam rawtna hi ṭha taka chhawnin, ramri-a tangkhang mekte awmna enfiah tura a rawtna pawh ṭha a ti niin a sawi.

Kumin kumtir lam khan Myanmar minister-te chuan ramri -a Rohingya awmte hi tlawhin, Myanmar rama kir leh tura an sawmna chu an pawm duh loh chuan a nghawng ṭha lo tak an la tuar thei dawn niin a hrilh. Ramri-a Rohingya awmte chuan Myanmar rawtna anga Bangladesh lamin chhawmdawlna a pek ṭhin a tihtawp chuan harsatna lian tak an tawh an hlauhthawn thu an sawi a, Myanmar lam aṭang hian mumal takin ei tur leh chhawmdawlna dang an dawng thei dawn em tih an chiang ngam lo tih an sawi a ni.