Korea ram pahnihten September-ah summit neih remti

South Korea leh North Korea chuan September thlaah NKorea khawpui, Pyongyang-a summit neih an remti a, hei hi SKorea President Moon Jae-in leh NKorea hotu Kim Jong-un ten summit an neih ṭum thumna tur a ni ang.

Nimin khan Korea ram pahnihte hian ramri bula Panmunjom khuaah high-level talk an nei a, summit neih hi an remti ta ni.

Meeting zawh hnua thuchhuah inṭawm an siamah, Moon-Kim summit hi September thla ral hma ngeiin Pyongyang-ah neih a ni dawn tih a sawi. Mahse summit neih ni tak tur leh a neihna hmun turte erawh an sawilang tel lo.

Panmunjom-a inbiakna neihah hian North Korea palaite hi Committee for the Peaceful Reunification of the Fatherland chairman Ri Son Gwon-an a ho a ni. Ri chuan inbiakna hlawhtling tak an neih niin a sawi. South Korea palaite hi Unification Minister Cho Myoung-gyon-an a ho a ni.