Caspian Sea: Ram panga-ten inremna ziak

Khawvela inland water lian ber, Caspian Sea hualtu ram panga–Russia, Iran, Azerbaijan, Kazakhstan leh Turkmenistan te chuan he tuipuia sum hnar awmte insem dan turah inremna an siam. Tuipuia sum hnar awmte insem dan an siam bakah, ramdangten sipai dan an tumna tur lo dan an tum bawk a ni.

Caspian Sea nihna dik tak, legal status hi sawi chian a la ni lo. Tuipui, Sea tia sawi theih a nih laiin Lake, dil tia sawi a ni ṭhin bawk. Kum 1991-a USSR a kehdarh hma khan USSR leh Iran chuan inṭawmin, dil tiin an sawi ṭhin.

Sea tia dah a nih chuan interational maritime law in a huam tel dawn a, ram dangte pawhin an hman theih dan chin a awm dawn a ni. Mahse Lake tih a nih chuan a hualtu ram panga-te hian a hausakna leh sum hnarte hi in ang tlangin an insem thei dawn thung a ni.

Caspian Sea hi oil leh gas reserve tamna nia sawi a ni a, tuipui mawngah hian oil barrel tluklehdingawn 50 leh natural gas cubic feet trillion 300 dawn a awm nia chhut a ni. Hei vang hian a chhehvela ramte pawh hi oil leh gas field insem dan chungchangah an inrem lo fo a, ram ṭhenkhat chuan midangte tihṭhaih nan indo lawng te pawh an lo tir tawh a ni.