Venezuela President-in fuel man tihsan tum

Venezuela President Nicolas Maduro chuan ram chhunga fuel mantlawma an zawrhna chu tihsan a ngai tih a sawi a, hehi an ram aṭanga dollar maktaduai tel man fuel tawlhruk a nih ṭhin danna atan a ngai niin a sawi.

TV-a thu a sawiah hemi chungchang hi sawichhuakin, President Maduro chuan Colombia leh Carribean-a fuel tawlhruk ṭhin venna atan ram chhunga fuel chu international price-a zawrhchhuah a ni tawh niin a sawi a ni.

Oil ngah ram dang ang bawkin Venezuela hian a mi leh sate tan petrol man hi nasa takin a titlawm a ni. Mahse hei hi smuggler-ten remchanga hmangin, Venezuela ramchhungah man tlawm taka fuel an lei chu an ṭhenmawm ramahte man to zawkin an hralh chhawng leh ṭhin a ni.

Venezuela ram hian sum leh pai lamah harsatna tawkin, ramchhungah thil man a sang chak hle a, mahse oil man erawh a danglam vak lo thung.

Media report-in a tarlan danin coffee no khat man hi bolivars maktaduai 2.2 ( black market rate-ah dollar 0.50 vel) a nih laiin, coffee no khat man hian petrol chu a let 9,000 vel a lei theih thung.

Maduro chuan fuel subsidy rate khuahkhirhna turah hian a ram mi dik tak, state ID cared neite chu a huam tel dawn lo tih a sawi a, mahse a man tlawma fuel lei thei tur hian an motor-te chu government census-ah an register a ngai thung dawn a ni.