Israel Prime Mnister leh Egypt President an inhmu tih nemnghet

Israel finance minister Moshe Kahlon chuan kumin May thla khan Israel Prime Minister Benjamin Netanyhu chuan Egypt President Abdel Fattah al-Sisi chu Egypt ramah hmuin, Gaza Strip-a inkahhai puan dan tur chungchang a sawipui tih a nemnghet.

PM Netanyahu leh President Sisi te inhmuh chungchang hi Thawhṭanni khan Israel-a Channel Ten News chuan a tarlang a, mahse hemi chungchang hi PM thupuangtu chuan a sawichiang duh lo a ni. Nimin khan finance minister hian ram hruaitu pahnihte inhmuh thu hi a nemnghet ta a ni.

Egypt leh United Nations chuan Israel leh Gaza Strip-a roreltu, Hamas-te inkara inremna a awm theihna turin hma lain, inkahhai an puan theihna tura inbiakna neihtir dan an ngaihtuah a ni.

Netanyahu leh Sisi hian Israel leh Egypt-in Gaza kalpawhna kawng an dansak thlahdul a nih theih dan turte pawh an sawidun niin Channel Ten chuan a report.

Gaza Strip-a cheng, Palestinian mi maktaduai hnih chuangte dinhmun hi a ṭha lo hle. Egypt leh Israel hian Gaza kalpawhna kawngte thununa an khuahkhirh avangin an ram sum dinhmum pawh a ṭha lo a, tui, electricity leh damdawi lam thlengin an mamawh ang an nei pha lo a ni.

Hetih lai hian Israel chuan Gaza kawng a dansakna chhan chu Hamas leh Palestinian firfiak pawl dangten Israel beihna atana ralthuam an lakluh ṭhin venna tur niin a sawi thung. Gaza aṭang hian Palestinian pawlte chuan tun hnaiah vawi eng emaw zat rocket hmangin Israel an bei a, hemi chhan let nan hian Israel sipaite chuan beihpui thlakin, Hamas ho hmun pawimawh hrang hrangte an kahchhiatsak a ni.

March 30 ṭanga Palestinian-ten Israel-Gaza ramri-a nawrh huaihawt a, Israel sipaite nen an intihbuainaah Israel sipaite silai hmehpuahah Palestinian mi 161 an thi tawh a, Israel sipai pakhat chu Palestinian sniper-in a kaphlum bawk.