Italy-a lei chimah mi 35 an thi

Italy-ah ruah sur nasa vangin Thawhlehni khan Genoa khuaa motorway bridge, Morandi bridge a chim a, mi 35 an thi a, mi 16 in hliam an tuar. Thi zingah hian naupang pathum an tel a, hliam tuar zinga mi 12-te chu an dinhmun a ṭha lo hle.

Lei hi meter 50-a sanga dawh a ni a, lei chim hian factory chung leh building ṭhenkhat a delh bakah a hnuaia motor eng emaw zat a chimpui bawk.

Transport Minister Danilo Toninelli chuan lei chim hi enkawl ṭhat tawk loh vanga thleng niin a sawi a, mawhphurtute chu an phu ang hremna pek ngei an ni dawn tih a sawi. Mahse he lei enkawltu, Austotrade official-te chuan lei chu danin a phut bak anga enkawl leh enfiah reng a nih ṭhin thu an sawi thung. Austrotrade official Stefano Marigliani chuan he lei hi a chim hma hian mipui leh motor tan pawha hlauhthawnawm engmah a awm loh thu a sawi a ni.

Genoa-a motorway bridge hi kum 1967-a dawh a ni a, km 1.2-a thui niin kum 2016 khan chei ṭhat a ni. He lei hi Italian Riviera leh France chhim lam inkalpawhna kawng ber atana hman a ni.

Austotrade chuan lei chim lai hian a foundation siamṭhat hna pawh thawh mek a ni tih a sawi a, mahse civil protection agency Angelo Borreli chuan lei cheiṭhat hna thawh engmah an hriat loh thu a sawi thung. Borelli chuan lei chim lai hian lei laiah hian motor 30-35 vel an awm niin a sawi a, heng zingah hian motor lian lorry pawh pathum a tel.

Lei chimna hmunah hian chhanchhuah hna leh lei chim thenfai hna thawk turin firefighter 200 tirh nghal an ni. Defence Minister Elisbaetta Trenta chuan chhanchhuah thawhna kawnga pui turin sipaite pawh inrintir nghal an nih thu a sawi.

Prime Minister Giuseppa Conte pawhin Thawhlehni khan chhiatna thleng vang hian Genoa hi a pan nghal a ni.