US-Russia security talk-ah inremna siam thei lo

United States leh Russia-in Thawhṭanni zana Geneva-a security talk an neih chu inremna siam loin an titawp.

US chuan Russia nena inbiakna an neih hi Russia nena an inkar boruak siamṭhatna tura inbiakna niin a sawi a, Russia lam hian security chungchanga inbiakna tiin a sawi ve bawk.

He inbiaknaah hian US aiawhte hi US deputy secretary of state Wendy Sheman-i'n a ho a, Russia palaite hi deputy foreign minister Sergei Ryabkov-a'n a ho a ni.

Ryabkov chuan meeting zawh hnuah press conference a neihah, an inbiaknaah hian inremna siam lo mah se Russia lamin rawtna a siamte chu America lam hian an ngai thutakin uluk taka an ngaihtuah thu a sawi. Russia-in Ukraine beih tumna a nei lo tih US palaite chu hrilhin, Ukraine nena an inkar buaina chhuah hlauhthawnna tur a awm lo tih a sawi.

Sherman pawhin darkar riat zet inbiakna an nei thei a, sawihona ṭha tak an neih thu a sawi bawk. Russia-in Ukraine beih a tum a nih chuan kum 2014 ami aia nasa khan a nghawng an tuar dawn tih pawh an hrilh thu a sawi a ni. US chuan chipchiar zawka sawiho tura inbiaka nei leh turin Russia official-te a sawm a ni, a ti.