UN in Afghanistan ṭanpuinan USD tld 5 tal mamawh
United Nations chuan nimin khan kumin chhungin Afghanistan-a mi rethei ṭanpuina tur leh kum 40 chhung rahbi tleu tawh chhanchhuahna atan USD tluklehdingawn nga tal an mamawh dawn tih a sawi.
UN hian Afghanistan ramchhung bikah hian $tld 4.4 vel an mamawh thu leh Afghan mipui ramri bula tawmhimna zawnga khawsa mekte tan $mtd 623 dang an mamawh tih a sawi a, hei hi ram khat tana UN-in sum a pekchhuah tam ber ṭum a ni.
UN hian Afghanistan rama cheng mi maktaduai 22 leh Afghan ram ṭhenawm hnai ram pangaa raltlan mi maktaduai 5.7-te chuan chhawmdawlna an mamawh tawh takzet tih a sawi.
"Chhum zing chhah tak ang maiin ṭanpui ngai an pung zel. Afghan mipuite hi lo thlahthlam lul suh ang che u. Ei tur tlachham te, natna hri te, ei tur ṭha nei lo leh heng avanga thihna a thlen lohnan in mi puihbawm kan ngai a ni" tiin UN aid chief Martin Griffiths chuan a sawi.
Nikum August thla aṭanga Taliban te'n Afghanistan-a rorelna an chan hnu khan ramchhungah sum indaih lohna, thil man sang leh hnathawh tur nei lo mi ṭhahnem tak an awm phah tawh a ni.
Washington chuan an ram asset tluklehdingawn chuang chu khawihchet theih lohin an hrensak a, chhawmdawlna an dawn ṭhinte pawh tihtawp sak an ni.Afghanistan hian nikum vek khan khawkheng nasa tak an tuar bawk a ni. Griffiths chuan aid package tel lo chuan Afghan mipuite hian hma hun an nei tawh lo tih a sawi.