San Quentin jail-ah ni 5 chhungin Covid-19 kai mi 600 awm

California-a San Quentin jail-ah ni nga chhungin jail tang zingah Covid-19 kai mi 600 an awm. He jail-ah hian hri kai mek hi mi 1,100 chuang an awm tawh a ni.

San Quentin jail-a hri kai an pun chhoh avang hian tangte chhuah turin mi 10,000 chuangin petition an thehluh lut tawh a, kar liam ta khan Alameda County's Public Defender (ACPD) office pawhin jail tangte chhuah turin ngenna hi an lo thehlut tawh  a ni. 

He jail-a tang kum 60 chin leh damlo natna neite chu chhuah lailawk turin California Department of Corrections and Rehabilitation (CDCR) hnenah ngenna an thehluh. Hri darh zel tur ven a nih theih nana jail tangte chhuah dan tur ngaihtuah vat turin petition thehluttute chuan CDCR an ngen. San Quentin jail-ah hian Covid-19 hri kai mi 2,613 an awm a, heng zinga mi 1,350 te ni 14 chhunga enkawl dam tawh niin, he hri vanga thi hi mi 22 an awm tawh bawk.

June thla khan jail tang zingah hri kai hmuh chhuah ṭan a ni a, kar hnih liam ta khan hri kai hmuh chhuah hi mi 821 an awm a ni. Jail chhunga hri kai an awm chhan hi May 30-a Chino jail aṭanga jail tang 121 an sawnluh aṭanga inṭan nia rin a ni a, kar hnih liam ta khan he jail-ah hian hri kai thar mi 821 an awm hman a, he jail-ah hian June thla  aṭang khan hri kai hmuchhuah ṭan a ni. He jail-a hri awm chhan hi May 30-a Chino aṭanga jail tang mi 121 an sawn luh aṭanga inṭan nia rin a ni a, heng mite hi San Quentin jail-a dahluh an nih hian test an ni lo.

California state senator Nancy Skinner chuan an state sorkarin Covid-19 dona kawngah  theihtawpa hna an thawh mek thu a sawi bawk. California-ah hian hri kai mi 2,23,000 vel an awm a, heng zinga mi 5,980 chu he hri vang hian an thi a ni. US ram pumah Nilaini khan hri kai hmuh thar mi 50,000 dawn an awm a, Covid-19 kai hmuh tawh hi mi 27,80,152 an tling tawh. Hri kai zinga 11,64,794 chu an dam tawh a, mi 1,30,798 in an thihpui tawh thung.