Imran Khan leh Shehbaz Sharif-ten nomination paper thehluh

Pakistan Parliament lower house, National Assembly-a vawiina Prime Minister thar thlanna neih tura chuh turin nimin khan Pakistan Tehreek-e-Insaf (PTI) chairman Imran Khan leh Pakistan Muslim League-Nawaz (PML-N) President Shehbaz Sharif te chuan nomination paper an thehlut.

National Assembly Speaker atana thlan thar, Asad Qaiser chuan nimin khan PM thlan tur chungchanga hriattirna hi tichhuakin, chuh tumte tan chawhnu dar 2 thleng hun a hawng a ni. Dar 2-ah nomination paper lutte hi enfiah nghal a ni bawk.

July thlaa Parliament inthlanpui neiha party mala seat la hnem ber, PTI chuan sorkarna an siam dawn tih sawiin, an party hotu Imran Khan chu August 18 hian Islamabad-a President House-ah prime minister thar atan lakluh a ni dawn tih a lo puang tawh a ni.