New Zealand-in ramdang mi hnenah in hralh khap

New Zealand Parliament chuan ramdang miten an rama in an lei a khap.

He khapna hian non-residents chauh a huam thung a, hei bakah hian free-trade deal a siampui Australian leh Singapore mite a huam tel lo bawk. Tun hnaiah New Zealand-a hian housing stock tlem vang leh pem lut tam vangin in man pawh a sang chak hle.

Nilainia Parliament-a Overseas Investment Amendment Bill ngaihtuahnaah hian a thlawplamah vote 63 a tla a, a duh lo lamah vote 57 a tla thung. He dan thar hmang hian ramdang mi, New Zealand-a cheng ni lote chu in an lei khapsak an ni dawn a, mahse apartment thar siamnaah investment erawh an ti thei dawn thung.

Trade and Economic Development Minister David Parker chuan bill an pass chu an ram tana mellung pawimawh tak anih thu a sawi a, sorkar chuan New Zeland mite chu ramdang mi hausa zawkten an chimral leh an luahlan a remti dawn lo tih a sawi.

New Zealand-a hian ramdang mi hausa ten in leh ram an lei nasa hle. Kum 10 kalta chhung khan in man hi chawhrualin 10% velin a sang a, hetihlai hian an rama khawpui lian ber Auckland-ah chuan kum 10 chhungin in man hi a let dawnin a pung bawk.