US military parade neih hun tur sawn hla

US President Donald Trump-an Veteran day-a Washington DC-a military parade neih tura a tih chu kum 2019-ah sawn hlat a ni.

Military parade hi November thlar hian Indopui-I na tawpna kum 100 champha leh veteran-te chawimawina puala buatsaih tum a ni. President Trump hian kum 2017-a France rama Bastille Day lawmna a hmanpui hnuah hetianga military parade ropui tak buatsaih ve hi a tum a ni.

Mahse defence official-te chuan parade neih tur hi nakkum atan sawnhlat a nih thu an sawi. He parade neih tur atana sum senso tura ruahman chu a tira an chhut aiin a let thum, dollar maktaduai 90 vel zet a ngai dawn niin an sawi.

Pentagon thupuangtu Colonel Rob Manning chuan thuchhuah siamin, Deparment of Defence leh White House chuan military parade hi kum 2019-ah hun remchang awmah buatsaih zawk an remti tih a sawi.

Kumin February thlaa President Trump-an parade buatsaih a duh thu a sawi khan parade budget director chuan a senso atan hian dollar maktaduai 10-30 vel a ngai dawn niin a chhut. Mahse Ningani khan official-te chuan parade buatsaihna tur senso atan hian a tira chhut aiin a let thum zetin a hautak dawn a, dollar maktaduai 92 vel zet sen a ngai dawn niin an sawi leh a ni.

Trump-an military parade buatsaih a tum thu a sawi hian Democratic party member-te chuan nasa takin an sawisel nghal a, congressman Jim McGovern chuan ṭul loa sum khawhralna mai mai nia sawiin, Trump chu president ni loa dictator anga a chet chhoh thu a twitter-ah a tarlang.