Khawvela president hlui rethei berin pension la duh lo

A khawsak dan tlawm tak avanga khawvela president hlui rethei ber tia sawi ṭhin, Uruguay president hlui Jose Mujica chuan senator a nihna aṭanga a pension chu a la dawn lo tih a sawi.

Uruguay president dinhmun, kum nga term a chelh zawhah kum 2015 khan Mujica hi senator atan thlan a ni leh a, Thawhlehni khan senator a nihna aṭang hian a bang a ni. A farm-a hun tam zawk hman a duh tih a sawi. A senator term hi kum 2020 thleng tur ni mah se, kum 83 mi Mujica chuan a kum upa leh chak tawk tawh loh vangin a bang tih a sawi. President hlui hian a banna lehkha hi Senate hotu, Uruguay vice president leh a nupui ni bawk, Lucía Topolansky hnenah a thehlut a ni. Banna a thehluh rual hian a thawhpui te, debate an neih ṭhinna a an rilru tihnat a lo neihte lakah ngaihdam a dil thu a sawi nghal bawk.