US-in hrekna siam belhah Turkey vau

US chuan Turkey jail-a tang mek, American pastor Andrew Brunson chu chhuah tura phut nawn lehin, chhuah a nih loh chuan Turkey ram economy hrekna dang siam belhah a vau.

Pastor Andrew Brunson chu Turkey sorkarin dan pawna a hnawl, political group-te nena inzawmna neia puhin an man a, kum hnih dawn jail-ah tantir a ni tawh a ni. Brunson hian an puhna hi thu dik lo niin a sawi a, mahse thiam loh chantir a nih chuan kum 35 thleng tantir theih a ni ang.

US chuan Pastor Brunson chhuah tur hian Turkey sorkar chu a nawr fo a, a chhuah duh loh vangin an ram hrekna pawh alo siam tawh a ni. Nimin khan US President Donald Trump chuan a twitter-ah Pastor Brunson chungchang hi a sawilang leh a ni. President Trump chuan, "Turkey hian kum tak tam chhung chu US ṭhatna hi remchangah a lo la tawh a ni. Tunah hian kan Kristian pastor ṭha tak a hreng mek a ni. Mi pawisawi lo chhuahtir na tur hian engmah pek an ngai lo a, an chhuah lo a nih chuan kan hrek zawk dawn a ni", a ti.

US Treasury Secretary Steven Mnuchin pawhin Brunson hi chhuah a nih thuai loh chuan Turkey laka hma lak dan tur ruahmanna te pawh an siam vek tawh niin a sawi. US hian kar hmasa khan Turkeya ṭanga metal a lakluh ṭhina chhiah lak chu a letin a lo tipung tawh a ni.

Hetihlai hian Turkey chuan US vauna lakah chuan an tlawm mai dawn lo tih a sawi thung. Turkey President Recep Tayyip Erdogan chuan US chuan Turkey chu a hmaa ṭhingṭhittir a tum a ni, a ti.