UK-a Windsor Castle bul hnaihah thlawhtheihna thlawh khap

England chhim lama Berkshire, Windsor Castle-a Queen Elizabeth II chenna chu venhimna chungchangah tun thla tawp aṭangin thlawh phal lohna hmun, no-fly zone-ah an puang dawn tih Britain police te chuan Thawhlehni khan an sawi.

Thames Valley Police leh Metropolitan Police Service te chuan Windsor-a thlawhtheihna eng chi pawh thlawh khapna "restricted airspace order" an dilna chu UK-a Civil Aviation Authority (CAA) chuan an lo pawmsak a ni.

Metropolitan Police te chuan CAA hnena an ngenna hi security lama inremfel dan chungchang an enfel duh vang anih thu leh invauna emaw intelligence lam emaw vang anih loh thu an sawi.

Social media lama video darhah hian Met Police te chuan Krismas ni khan castle chhungah mipa pakhat, Indian Sikh Jaswant Singh Chail nia inchhal chuan Amritsar-ah kum 1919-a Jallianwala Bagh-ah rawng taka inthahna a thlen ṭuma phuba lak tumin Queen chu thah a tum tih an sawi a ni.