Omicron vangin Covid-19 vaccine neihsa te thawmṭhat ngai : WHO technical body

World Health Organization technical body-te chuan Thawhlehni khan Covid-19 vaccine kan hman mek chu Omicron leh coronavirus variant thar lo awm tur dangte laka min veng him thei tura thawmṭhat a ngaih thu an sawi.

WHO-a Technical Advisory Group on COVID-19 Vaccine Composition (TAG-CO-VAC)-a independent expert mi 18 ṭhu khawmte chuan vaccine kan hman mek te hian natna laka min ven theihna leh Variant Of Concern (VOC) vanga thihna laka min ventheihna sang tak nei mahse, vaccine inchawhpawlh dan thlak danglam chu kalkhawmte hian an rawt a ni. Covid-19 vaccine kan hman mekte chu hri insiamdanglam zel dona atana siam danglam leh thawmṭhat a ngai a ni, an ti.

Mithiamte hian Covid-19 vaccine siamchhuaktute chu vaccine pangai leh Omicron tan bika siam vaccine hnathawhdan enfiaha, engtikah nge vaccine siamdanglam angaih dawn tih an hriat theihnan data kimchang thehlut turin a ngen. Omicron variant chungchangah mithiamte chuan khawvel huapa Covid-19 vaccine zau zawka semchhuah a pawimawh thu an sawi uar hle a ni.

Thawhṭanni khan Pfizer chief executive Albert Bourla chuan Omicron variant tan bika siam vaccine a ngaih tur thu sawiin, an company chuan March thla hian tlangzarh an tum tih a sawi. Moderna Inc (MRNA.O) pawhin Omicron do hneh thei tur vaccine an buaipui mek thu sawi mah se, thla hnih tal la nghah a ngai dawn thung a ni.

WHO official te chuan vaccine siamdanglam tur chuan khawvel ram te an inthurual a pawimawh thu leh vaccine siamchhuaktu te kutah chauh dah lo turin thupek an lo tichhuak tawh a ni.