US pawisa thira mihang hmeichhe chuang thei hmasaber Maya Angelou
Ziakmi leh activist Maya Angelou chu US Mint-in pawisa thir (quarter) an tihchhuah thara mihang hmeichhia lang thei hmasa ber a ni dawn.
"I Know Why the Caged Bird Sings" ziaktu Maya Angelou hi nikum January thlaa dan anga an inziahluh hnua American Women Quarters Program kaltlanga lakluh hmasak ber a ni bawk. Angelou hi kum 1928 khan Missouri-ah a piang a,
Civil Rights Movement chhung khan Martin Luther King Jr. leh Malcolm X-te nen an thawkho ṭhin a ni.
Angelou hi president hlui Bill Clinton an lakluh ṭuma hla thu (poem) chhamtu niin, kum 2014 khan a boral a ni.
US Mint chuan Angelou chuanna American quarter cent 25 chu an thawnchhuak ṭan tawh tih agency chuan a tarlang. "America tana thawhhlawk leh sulhnu nei ṭha hmeichhe chuanna pawisa thir ka tlangzarh thei hi ka lawm hle a ni" tiin Mint deputy director Ventris Gibson chuan a sawi.
US Mint chuan kum 2022-2025 inkar hian ramchhunga mibik leh sulsutu hmeichhia panga pualin an mahni chuanna pawisa thir tichhuak turin ruahmanna an siam tih an sawi.
Treasury Secretary Janet Yellen chuan America rama hmeichhe chhuanawm tak takte kan ngaihhlutzia kan lantir thei tur hi ka lawm takzet tih sawiin, "Pawisa kan hmanlai kan thlak danglam dawn apiang hian kan ram chanchin leh kan ngaihhlut zawngte bakah society anga kan thlen thui tawh zia kan hre nawn leh ṭhin a ni" tiin a thuchhuah an siam.
Pawisa thirah hian kum 90 chhung chu US president hmasaber George Washington leh mû (eagle) lem chu a lo chuang tawh a ni. Quarter thar hi Philadelphia leh Denver-ah chher niin, Washington leh Angelou lem hi a chuang tawh dawn a ni.
Kum 2022 chhunga pawisa thira lang tura chhawpchhuah te :
America mi hmeichhe zinga vanthengreng (Space)-a inkapchhuak hmasa ber - Sally Ride
Cherokee rama hmeichhe zinga principal chief ni thei hmasa ber - Wilma Mankiller
New Mexico-a hmeichhia te'n vote an thlak theihna tura hmalatu leh an hotu - Nina Otero-Warren
Chinese-American film star - Anna May Wong te an ni.
