Thla hnih chhungin Europe mipui 50%-in Omicron kai dawn : WHO

World Health Organization chuan Thawhlehni khan hri kai dan rate ngaihtuahin, thla hnih chhung hian Europe mipui chanve velin hri chi thar leh inkaichhawn awl tak Omicron coronavirus variant kai thei dinhmunah an ding tih a sawi.

Regional director Hans Kluge chuan "Institute for Health Metrics and Evaluation (IHME) chuan hri kai dan rate ngaihtuahin, tun aṭanga kar ruk aṭanga kar riat chhung hian Omicron kai 50%-in an pung chho thei dawn a ni," a ti.

WHO European region-ah hian ram leh territory 53, Central Asia ram ṭhenkhat zinga hmun 50-ahte chuan Omicron hri kai hi an hmuchhuak tawh a ni.

WHO tarlan danin, ram 26-te chuan January 10 thleng khan ram mipui zat aṭangin kar tin hri kai thar 1% an awm ziah tih sawiin, kum 2022 chhungin region-ah Covid-19 kai thar mi maktaduai sarih chuang an awm tawh a ni.

Kar liam taa data lakkhawm chuan Omicron chu hri leng dang aiin inkaichhawn a awl zawk a, hri inthlak danglam hian mihring cell a luh awlsam mai piah lamah, hri kai tawh leh vaccine dose kima la tawhte pawhin an kai nawn leh thei tih Kluge chuan a sawi.

Hetihlai hian Kluge chuan vaccine hian Omicron vanga natna khirhkhan leh thihna hial kan tawh theihna lakah min veng thei a ni, a ti.