Pakistan PM thar atan Imran Khan lalut ; Vawiinah a cabinet minister-te lalut dawn

Pakistan Prime Minister thar atan Pakistan Tehreek-e-Insaf (PTI) hotu Imran Khan chu Inrinni khan rinawmna thu tiamtira lakluh a ni ta.

Pakistan President Mamnoon Hussain chuan Islamabad-a President House-ah Imran Khan hi rinawmna thu a tiamtir a ni.

Zirtawpni kha Pakistan Parliament lower house, National Assembly chuan Prime Minister atan Imran Khan hi an thlang a ni. Inthlanah hian Khan hian a khingpui, Pakistan Muslim League-Nawaz (PML-N) candidate Shahbaz Sharif Bilawal Zardari a hneh. PM thar thlannaah hian Pakistan People's Party chuan eptu ṭangrualte candidate, Shahbaz Sharif chu an ram hotu lu ber dinhmun chelh tura an rin tawk loh thu sawiin vote an thlak vek lo.

PM thar thlannaah hian kum 65 mi, PTI candidate Imran Khan hian vote 176 hmuin Sharif hian hian vote 96 a hmu a ni. PM atana thlan a nih hnua a thusawiah, Khan chuan an rama a ṭha lama inthlak danglamna nasa tak thlentir a tum tih sawiin, an ram lo rawktute chu chhuichhuah zel an ni dawn tih a sawi.

PM thar Imran Khan chuan a cabinet minister thar mi 21 a puang nghal a, vawiin hian rinawmna thu tiamtira lakluh an ni ang. Cabinet minister thar tur zingah hian president hlui General (retd) Pervez Musharraf hunlaia chanvo pawimawh lo chelh tawh eng emaw zat an awm. Hming puang 21 zinga 16-te chu minister an ni ang a, a bak panga-te chu prime minister adviser angin an awm dawn niin PTI thupuangtu Fawad Chaudhry chuan a sawi.

Minister thar tur zingah hian Musharraf-a president laia a thupuangtu, attorney leh cabinet member te an tel a, Pakistan Peoples Party sorkar laia cabinet minister panga an tel bawk. Cabinet-ah hian hmeichhe pathum, Shireen Mazari, Zubaida Jalal leh Fehmida Mriza te dah tel an ni.