Kofi Annan vui hun tur la tichiang lo ; Ram hrang hrang hruaituten an ui

United Nation Secretary-General hlui leh khawvel chawimawina sang Nobel Peace Prize lo dawng tawh, Kofi Annan chu kar kalta Inrinni khan kum 80 mi niin Bern, Switzerland-ah a thi.

Annan hian a nupui leh fa pathum a kalsan a, a vui hun tur hi puan a la ni lo.

Kofi Annan hian UN hotu hi term hnih, kum 1997-2006 chhung khan a chelh a, Ghana mi hi mihang zinga he dinhmun chelh thei hmasa ber a ni. UN hotu aṭanga a chawlh hnu hian Syria-a UN special envoy-ah a awm zui leh a ni.

Ram hrang hrang hruaitute chuan Kofi Annan an ui leh an sun thu an sawi. UN Secretary-General nilai Antonio Guterres chuan Annan chu hruaitu ṭha a nih thu a sawi.

Russia President Vladimir Putin chuan mi ropui tak a nih thu sawiin Russia chuan a hre reng dawn a ni, a ti.

US President hlui Barack Obama chuan Annan chu khawvel ṭha zawk siam tuma theihtawp chhuahtu a ni, a ti.

India Prime Minister Narendra Modi pawhin Anan chu humanitarian chauh ni loin, khawvel himna leh muanna vawngtu a ni, a ti.

German Chancellor Angela Merkel-i chuan Annan chu ṭhalaite chawh phur thiam tak a ni tih sawiin, khawvelin harsatna a tawh ṭhinna chinfelna tur zawnna kawnga hmalaknaah Kofi Annan-a thu leh hlate chu an la ngai dawn chauh niin a sawi.

France President Emmanuel Macron chuan Annan-a mizia dam tak leh buaina chinfelna tura a tumruhna te, a inpekna te chu khawvelin a theihnghilh tawh dawn lo tih a sawi.

Ghana President Nana Akufo-Addo chuan Anna chu an ram pasalṭha ropui zinga mi a nih tih sawiin, ram pumah kar khat chhung sun a ni dawn tih a puang nghal bawk.