Ecuador-in Venezuela mite khuahkhirhna siam

Ecuador chuan an ram Venezuela mi, passpor nei loa lutte lo danna turin dan thar a siam a, hei vang hian Ecuador-a luh tum mi tam tak chu Colombia-ah an tangkhang phah.

Venezuela tualchhung politics buaina avang leh, ei leh bar lama harsatna an tawh avangin mi tam tak chu ram dangah an tlanchhe tawh a, an zinga tam tak hian Colombia

aṭangin identity card chauh hmangin Ecuador hi an lut a ni. Peru leh Chile ramah pawh mi eng emaw zat an lut bawk.

Colombia sorkarin Venezuela mi pem lut turte luh khapna a siam hi an ram mipuite chuan an sawisel a, ramri-ah dinhmun hrehawm takin mi tam tak an awm phah niin an sawi.

Brazil rama khaw pakhatah pawh Venezuela pemlutte awmna camp chu Inrinni khan mi ṭhenkhatin an bei a, he camp-a awmte chu ramri lamah an um chhuak a ni.

Venezuela ram hian hun rei tak chhung ei leh bar lamah harsatna an tawk tawh a, damdawi thlengin an indaih tawh lo a ni. Thil man a sang chak hle bawk a, hei vang hian dinhmun ṭha zawk beiseiin mi tam tak an pemchhuak a ni.

Thla 15 kalta chhung khan Colombia ramah hian Venezuela mi maktaduai khat chuang an pem lut tawh a, official-ten an chhut danin nitin Ecuador ramri-ah hian mi 4,000 chuang an thleng ziah a ni. Inrinni aṭang khan passport nei lote chu ramri an kan khapsak ṭan nghal an ni.

Peru pawhin Ecuador tih dan zuiin, August 25 aṭangin passport nei lo chu an rama luh a khap ve dawn a ni. Brazil chuan tun thla tir lam aṭang khan Venezuela mi pem luh tumte dan nan hian a ramri a lo khar tawh bawk.