Korean War vanga chhungkaw inṭhente inhmuhna hun siam

Korea ram pahnihte chuan nimin khan Korean War avanga chhungkaw inṭhendarh zinga ṭhenkhate inhmuhna hun a siamsak leh a, South Korea aṭangin mi eng emaw zatin kum 70 kaltaa an chhungte an ṭhen takte hmu turin North Korea an pan.

Chhungkaw inhmuhkhawmna hun hi North Korea-a Mount Kumgang resort-ah ni thum chhung neih a ni ang. Hei hi Korea ram pahnihten kum thum hnua family reunion an buatsaihna lehna hmasa ber a ni.

1930-53 Korean War vang khan Korea chhungkaw tam tam chu ṭhendarh an ni. Kum 2000 aṭang khan ram pahnihte hian chhungkaw inhmuhna hun hi ṭum 20 an buatsaih tawh a, mahse indo lai hre pha mi tam tak chu an chhungte nena inhmu hman lo hian an thi tawh a ni.

Chhungkaw inhmuhna hun buatsaiha tel duha inziak lut hi South Korea lamah hian mi 130,000 zet an awm. An zinga tam tak an thi tawh a, a la dam zingah pawh a tam zawk chu kum 80 chunglam an ni tawh. Tun ṭuma inhmuhkhawmna hun hmang tura thlan chhuah zinga upa ber chu Baik Sung-kyu, kum 101 mi a ni. Ani hian a monu leh tute a hmu dawn a, an tan hian thawmhnaw, phekhawk, toothbrush leh toothpaste-te a kensak tih a sawi.

North Korea-a an chhungte hmu tura kal zinga kum upa zawkte enkawl tur hian doctor paruk leh nurse sawm chuang an tel bawk. Chhungkaw inhmuhkhawmna buatsaihna hmun hi North Korea agency-ten an endik reng dawn a ni. Midang tel loin an chhungte nen hian room an siamah darkar thum vel chauh an inhmu thei ang.