Military Secretary Residence-ah Imran Khan a cheng dawn

Pakistan Prime Minister thar Imran Khan chuan Prime Minister House-a cheng loin, bedroom pathum chauh awmna military secretary residence-ah a cheng dawn tih a sawi.

Prime Minister atana lakluh a nih hnuah a thusawi hmasa berah, Imran Khan chuan inremna kalpui a tum thu a sawi a, hei hian amah ngei pawh a huam tel dawn tih a sawi. PM House-ah cheng loin, Banigala-a ama inah chen chhunzawm a duh a, mahse security agency-ten a him tawk lo tia an sawi avangin a awmna pawh sawn tur a nih chauh thu a sawi.

Imran Khan chuan PM House-ah chuan hnathawktu mi 524 zet awmin, car pawh 80 lai a awm tih a sawi. PM hian bulletproof car 33 neiin, helicopter leh aeroplane te an nei bawk a, governor house lian tak takte a awm bawk a ni, a ti. Hetianga hautak taka khawsak hi a tum lo tih sawiin, Pakistan Tehreek-e-Insaf (PTI) hotu chuan mipuite tana sum hman tur neih loh laiin mi ṭhenkhat chu nuamsa takin, hautak takin an khawsa a ni, a ti.

Amah leh ram tana inrenchemna kalpui a tum dante sawiin, a chenna inah chuan hnathawktu mi 524 aiah pahnih chauh a chhawr dawn a, bedroom pathum chauh awmna inah chengin, car pawh pahnih chauh a kawl tur thu a sawi. A kaihhruai sorkar chuan bulletproof car te chu a lilam vek dawn tih a sawi bawk. Governor-te chenna in pawh a hautak lo thei anga bera sawngbawl a nih tur thu a sawi. PM House chu research university atana leh a duh thu a sawi a ni.