Pakistan sorkar tharin Sharif-a te pafa an ram chhuahsan khap

Pakistan Prime Minister thar Imran Khan-a kaihhruai sorkar chuan jail-a tang mek, prime minister lui Nawaz Sharif leh a fanu Maryam-te chu an ram chhuahsan khapsak ho, Exit Control List-ah a telh.

Pakistan cabinet thar meeting hmasa berah Sharif-te pafa chungchang hi ngaihtuah tel a ni a, an ram aṭanga an tlanchhiat mai thei lohna turin list-ah telh hi an rel a ni. Hei hi sorkarin eiruk do beihpui a thlakna peng pakhat niin PM chuan a sawi.

Cabinet chuan Sharif-a fapa pahnihn, Hassan leh Hussain bakah finance minister hlui Ishaq Dar-te lakah red warrant tichhuak turin law leh interior ministry-te a hrilh bawk a, Pakistan rama hruai kir turin a ti bawk a ni. An pathum hian National Accountability Bureau-in eiruk thubuai a thehluhah an hming a lang vek a ni.

Law ministry chu London-a Sharif-te chhungkua-in Avenfield-a in neih chungchang zawtfiah tura British sokar bepawp tura tih a ni bawk. Information Minister Fawad Chaudhry chuan Avenfield-a in chu Pakistan ram ta a ni, a ti.

Nawaz Sharif-te pafa hi Rawalpindi-a Adiala Jail-ah an tang mek a ni. National Accountability Bureau chuan eiruk thubuaiah kum 68 mi, Sharif-a hi kum 11 tang turin July thla khan a hrem a, a fanu kum 44 mi, Maryam hi kum riat tang turin a hrem bawk.