DR Congo-ah Ebola hri vanga thi 55 an tling tawh

DR Congo khawchhak lamah Ebola hri a leng thar leh a, he hri leng vanga thi hi tun thla chhungin mi 55 an tling tawh. Sorkar chuan Ebola hri veite chu thla thum chhung a thlawna enkawl an ni dawn tih a puang nghal bawk.

Health ministry chuan thuchhuah siamin, Ebola hri len leh ṭanna chu North Kivu province-a Beni aṭangin a nih thu a sawi. He bial chhungah hian hri hri vei hi mi 69 an awm tih finfiah a ni tawh a, midang 27 pawh an dinhmun enfiah mek a ni, a ti.

Beni mayor Jean Edmond Nyonyi Masumbuko Bwanakawa chuan sorkar chuan Thawhṭanni aṭang khan Beni, Mabalako-Mangina leh Oicha-ahte Ebola hri veite hi a thlawna thla thum chhung enkawlna chu kalpui ṭan a ni tih a sawi.

Ebola hri hi August 1 khan North Kivy province-ah hian an hmu thar leh a ni. Hei hi kum 1976 aṭanga DR Congo-a a len ṭum 10-na a ni. Ebola hi enkawl dam theih loh nia ngaih ṭhin a ni. Mahse a vei hriatte hi rang taka enkawl an nih chuan enkawl dam theih an ni thung. A veite hi an luak bakah, kawṭhalo leh dehydration te an nei a ni.

Kum 2013-15 chhung khan West Africa-a Guinea, Liberia leh Sierra Leone ramahte Ebola hri leng vang hian mi 11,300 an thi a ni.