Pakistan PM-in media khuahkhirhna a hlip

Pakistan Prime Minister thar, Imran Khan-a kaihhruai sorkar chuan an rama state-run media outlet khuahkhirhna te a hlih sak.

Information Minister Chaudhary Fawad Hussain chuan sorkar thar hnuaiah thla thum chhungin information ministry-ah inthlak danglamna nasa tak hmuh theihin a awm dawn tih a sawi. Sorkar hnuaia institution, Pakistan Television leh Radio Pakistan-te tan kaihhruaina thar siam niin, editorial chungchangah pawh zalenna pek an ni, a ti. Hengte hi PM Imran Khan-a duhdan anga siam a nih thu a sawi.

Minister chuan internet-ah English-language channel siam a rawt bawk a, hei hi a bikin ram pawn lam mite tan a ṭul niin a sawi. Ministry hnenah pawh khawvel ram dangte hriata Pakistan chungchang a ṭha lam hawia pholan uar turte, organisation-te pawh sum lakluh theihna tura an programme-te changtlung zawka siam dan ngaihtuah turte in a ti.

PM thar Imran Khan chuan an ram kalphung chu thlak danglam a ngai tih sawiin, an thlak loh chuan chhiatna lam an pan zel dawn niin a sawi. An ṭhenawm ramte nena inzawmna ṭha zawk siam a ṭul thute a sawi bawk.

Khan chuan a kaihhruai sorkar chuan eirukna umbo turin theihtawp a chhuah dawn a, Securities and Exchange Commission of Pakistan (SECP) pawh a siamṭhat tur thu a sawi. Hma an lak tak tak hunah chuan eiruknaa inhnamhnawihte chuan sorkar chu an rawn bei ngei dawn tih sawiin, democracy tana hlauhawm angin an rawn puh ngei dawn tih a sawi. Mahse Pakistan humhim nge an duh, heng eiru politician te humhim zawk tih duhthlan a ngai dawn a ni,a ti.

Ram pawn lama sum chheprelhte lalet turin thuneitu sang task force din pawh PM chuan a tiam bawk. Hetianga an ram sum chheprelh tute chu misual an ni, tiin a sawi.