Trump-a campaign chief hlui thiam loh chantir

US President Donald Trump-a campaign chairman hlui, Paul Manafort chu thubuai 18 siamsak zinga pariatah thiam loh chantir a ni.

Manafort-a thiam loh chantirna zinga panga chu tax document dik lo thehluha puhna a ni a, a dang pathum chu foreign bank account registration leh bank-a thil dik lo tia puhna kaihhnawihte an ni.

Judge TS Elliss III chuan court thutlukna hi Thawhlehni khan a puang a ni. A thubuai dang 10-ah erawh chuan thutlukna siam a la ni lo.

Kum 69 mi, Manafort hian kum 2016 March thla khan Trump campaign team hi a zawm a, hemi kum August thla laihawl thlengin Trump-a campaign chairman a ni zui a ni. Thubuai siamsakte hi kum 2016 US President thlanna hmaa thil thlengte a ni. Manafort hian sum chheprelh leh inphiarna kalpuia puh chungchang thubuai a la nei a, he thuhuai hi kumin September thla hian Washington DC-ah ngaihtuah a ni leh ang.

Manafort-a laka thubuai te hi Special Counsel Robert Mueller-an US President thlannaa Russia inrawlha puh a nih chungchang leh, Trump campaign team leh Russia-in inzawmna neia puh an nih chungchang a chhuina aṭanga chhuak a ni.

President Trump chuan Manafort-a chu mi ṭha tak a nih thu sawiin, a thubuai relsak a nih dan chu pawi a tih thu a sawi a, Mueller-a thil chhui dan chu a sawisel zui nghal bawk.