Singapore-a Covid inkaihhruaina bawhchhiat vangin KFC pawisa chawitir

Singapore court chuan Nilaini khan American fast food giant KFC chu an rama Covid-19 inkaihhruaina dan chi hnih an bawhchhiat avangin thiam loh a chantir.

KFC (Kentucky Fried Chicken) nghaktute hian nikum July 10 khan an dawr chhungah Covid-19 symptoms an nei em tih enfiah hmasa loa customer pali an luhtir vangin an hrem a ni.

Channel News Asia tarlan danin, Singapore-ah khatih hunlai khan mi pahnih aia tam luh khapna dan an siam bakah social distancing dan an bawhchhe bawk tih an sawi.

KFC aiawha thubuai la tu operations director Jonathan Liew Tiong Soo chuan dan lama mithiamte puihna la tur in kar khat chhung hun a dil belh a, thubuai hi January 21-ah ngaihtuah ṭhat leh tura sawn anih thu report chuan a tarlang.

KFC hian thubuai pakhatah thiam loh an chang anih chuan SGD 10,000 (USD 7,400.28) thleng an chawi thei a ni. Hetihlai hian Singapore-ah Thawhlehni khan Covid-19 kai thar mi 846 awmin, hri kai hmuhchhuah zinga mi 400 chuang te chu rampawn aṭanga rawn lut an ni. Hri vanga thi an awm lo a, rampumah coronavirus kaihhnawih vanga thi mi 838 an awm tawh a ni. Singapore-a Covid-19 an hmuhchhuah aṭanga Thawhlehni thleng khan hri kai hmuhchhuah mi 2,87,243 an awm tawh a ni. Thawhlehni vek khan Omicron kai thar mi 438 awmin, rampawn aṭanga lut 279 leh tualchhunga hmuhchhuah 159 an awm tih Ministry of Health (MOH) chuan a tarlang.