Covid-19 leh hri leng dang lakah fimkhur rawh u : WHO

World Health Organization (WHO) chuan Nilaini khan nipui lo thleng tur atan Covid-19 hri darh mek leh chuap lam natna lakah fimkhur zual turin mipuite a chah. WHO-a Health Emergencies Program ami Dr. Maria van Kerkhove chuan mipui kan inzinpawh nasat avangin nipui laiin chuap lam natna, a bikin hritlang an tam phah thei tih a sawi.

Karliamta khan khawvel huapah Covid-19 kai thar mi maktaduai 15 chuang an awm a, kar khat chhunga hri kai an hmuhchhuah tamber anih thu WHO chuan a sawi. "Hri kai tamchhan ber chu Omicron variant vang a ni a, ramtin deuh thawah Delta thlaktu a ni der tawh a ni" tiin WHO Director-General Tedros Adhanom Ghebreyesus chuan a sawi.

Hetihlai hian nikum October thla aṭang khan kartina thihpui zat, weekly reported deaths chu chawhrualin mi 48,000 bawr vel an awm ziah a ni. Ram ṭhahnem takah hri kai damdawi-ina dah luh ngai pung zel mahse, hri leng hmasate erawh ala pha lo thung a ni. Omicron hi variant dangte aia a thawhnep zawk vang leh vaccine semchhuah emaw hri an lo kai tawh vanga an taksaa natna do tu khawl an insiam tawh vang emaw ani thei a ni, a ti.