Biden-an NKorea missile kahchhuahnaa mawhphurtute chungah hma la dawn
Joe Biden kaihhruai sorkar chuan Nilaini khan North Korea-in weapons program kaltlanga missile an kahchhuahnaa mawhphurtu, Russia leh China aṭanga ralthuam petu ni a an sawi NKorea mi paruk, Russia mi pakhat leh Russia rama ralthuam hmunpui neite chungah hremna hi lekkawh an tum tih Washington chuan a sawi.
US Treasury chuan North Korea missile program hmalakna chaktak tiṭhuanawp tur leh ralthuam siamna khawl ṭha zawk an neih lohna tura an hmalakna kalzel anih thu an sawi. Treasury Department hian nikum September thla aṭang khan North Korea chuan ballistic missile paruk an kapchhuak tawh a, hengte hian U.N. Security Council resolution an bawhchhe vek a ni, an ti. US hian NKorea hnena ralthuam siamna hmanrua lo petu mi panga te chu blacklist-ah dah turin United Nations Security Council hnenah rawtna an thlen a, North Korea sanctions committee member 15-te chuan an remtih ve a ngai thung a ni.
US president Joe Biden-an nikum January aṭanga thuneihna a chan hnuah Pyongyang chu nuclear bomb leh missile siam titawp tura a ngenin, an inbiakna hi a lo hlawhchham tawh a ni. US state department thupuangtu Ned Price chuan North Korea nen remna siam tura inbiakna neih an peih reng tih a sawi.
US thurualpui, South Korea chuan Washington chu North Korea chungah hian khauh zawka hmalakna kalpui tur leh Biden sorkar hmalakna avang hian NKorea chuan an ṭanchhan an thlak phaha an rin loh thu an sawi.
State Department chuan Russia rama cheng North Korean mi Choe Myong Hyon, Russia mi Roman Anatolyevich Alar leh Russian firm Parsek LLC te chu NKorea hnenah an ralthuam siamna hmanrua thawn ṭhinah an puh a ni.
US Secretary of State Anthony Blinken chuan thuchhuah siamin, kum 2016-2021 inkar khan O Yong Ho hi Parsek LLC leh Alar lama firm director-te nen an thawkdun tih sawiin, heng an thawhduna kaltlang hian ballistic missile application, Kevlar thread, aramid fiber, aviation oil, ball bearing leh precision milling machine-te an siamchhuak ṭhin tih a sawi.