Omicron variant hmuhchhuahnaah hri kai tlahniam : WHO

Omicron variant an hmuhchhuahna Africa rama hri leng thawh lina chu hri an hmuhchhuah aṭanga kar ruk hnuah tlakhniam lam a pan tih World Health Organisation (WHO) chuan a sawi.

Omicron variant hi nikum November 24 khan South Africa chuan WHO hnenah an report a, WHO chuan November 26 khan variant of concern-ah an puang a ni. "Africa rama hri leng thawh lina hi kan beisei aiin a rei lo. Africa-a hri leng thunun dan kawng ṭha hi kan mamawh takzet a, chumi kan hmuh theihna tur chuan rang leh chak zawka Covid-19 vaccine kan pekchhuah a ngai a ni. Hri leng lo awm leh tur hi chuan zah ngaihna min lantir tawh lo maithei a ni" tiin WHO Regional Director for Africa Dr. Matshidiso Moeti chuan a sawi.

WHO Director-General Tedros Adhanom Ghebreyesus chuan khawvel pumah vaccine dose tluklehdingawn 9.4 chuang semchhuah a ni tawh tih sawiin, nikum chhung khan ram 90 te chuan target an siam, ram mipui 40% hnena vaccine semchhuak tura an ruahmanna chu an puitlin thei lo a, ram 36 te chuan an ram mipui zinga 10% hnenah pawh vaccine an la semchhuak thei lo bawk a ni. Africa mipui zinga 85%, mi tluklehdingawn khat bawr velte chuan vaccine dose khatna hi an la la lo a ni. WHO chuan kar liam ta khan khawvel pumah Covid-19 hri kai mi mtd 15 chuang an hmuchhuak tih sawiin, kar khat chhunga hri kai an hmuhchhuah tamber ṭum a ni.

Omicron an hmuhchhuahna South Africa-ah chuan hri kai thar hi 9% in an tlahniam.East Africa leh Central Africa region-ah pawh hri kai hi an tlahniam bawk a ni. Hetihlai hian North leh West Africa lamah chuan hri kai an pung a, North Africa-ah chuan karkhat chhung lekin hri kai thar hi 121% in an pung tih WHO chuan a sawi. Africa thliarkarah hian hri vanga thihna chu 64% in a pung a, hei hi high risk group zinga hri kai an tam vang tih an sawi. "Hri leng thawh lina chhunga thihpui zat hi hri leng hmasate aiin an la tlem zawk hle a, damdawi-ina dahluh ngai pawh an la tlem hle a ni" tiin South Afirca-a ICU khum 5,600 zinga 9% te hi Covid-19 kai damlo te'n an luahlum mek tih WHO chuan a sawi.

Covid-19 enkawlna tur damdawi 2 pawmpuina pe
WHO panel-te chuan Covid-19 kai damlote enkawlna atan damdawi pahnih Eli Lilly (LLY.N) ,GlaxoSmithKline (GSK.L) leh Vir Biotechnology (VIR.O) te chu hri inkaichhawn awl tak Omicron variant darh zel karah pawmpuina an pe. Ningani khan panel chuan Covid-19 kai natna la na deuhte tan Olumiant hnuaia Lilly siam baricitinib leh damdawi-ina dah ngai damlo te tan GSK-Vir antibody therapy damdawi hnenah pawmpuina hi an pe a ni.