Kum 9 chhungin khawvela boruakin lum lam pan zel : US Agency

Kum kua liam ta 2013-2021 inkar chhung kha chhinchhiah theih china khawvel boruak lum zual top 10 zingah an tel vek tih US agency annual report chuan Ningani khan a tarlang.

Kum 2021 khan boruak lumzawng chawhrual, average temperature hi 1.51 degree Fahrenheit (0.84 degree Celsius) a ni a, kum zabi 20-na chhunga average ai pawhin a sang tawh zawk a, kum 1880 hnua khawvel boruak lum lamah parukna a ni pha hial tih zirchiangtute chuan a sawi.

National Oceanic and Atmospheric Administration (NOAA)-a senior climatologist Russell Vose chuan boruak bawlhhlawh, carbon dioxide tling khawm tam lutuk vang anih thu a sawiin, "Kumin hi boruak lum lamah top 10 kan thlen theihna 99% chance a awm a, hei ai pawh hian a sang thei a, a lum ber ṭum pawh a ni thei a ni," a ti.

Ningani vek khan Australia khawthlang lama tuipui kama Onslow khuaah boruak lum zawng chu 123.3F (50.7C) niin, chhinchhiah theih chinah Australia rama khaw lum ber ṭum a ni.

NASA-in boruak lum zawng an tehna,global temperature zirchianna in a tarlan danin, kum 2021 kha kum 2018 nen a boruak lum zawng chu intluk tawk velah a dah a, boruak lum zawng hi an chhinchhiah tawh china a lum ber paruknaah an dah a ni. Heng data pahnihte hi European Union Copernicus Climate Change Service tehdan nen a danglam thung. Kum zabi 19-na hnua boruak lum lamah kum 2021 kha panga naah an dah thung a ni.

Climate scientist te chuan thlipui nasa tak vanga chhhiatna liantham tak kan tawh lohna turin tun kum zabi chhung hi chu kan boruak lum zawng 1.5oC (2.7oF)-ah kan dah a pawimawh thu an sawi. Tuna kan boruak lum zel dan ngaihtuahin, kan chenna leilung hi kum 2030-ah chuan boruak lum zawng hi 1.5oC a ni hman dawn tih an sawi.