Iran-in Israel leh US vau

Iran Revolutionary Guards chuan an ram beih a nih chuan US leh Israel khawpuite an bei let ve nghal dawn niin a sawi.

Revolutionary Guards chuan US in a ballistic missile programme titawp turin nawr reng mah se, an ram invenhimna tura hmalakna chu a kalpui chhunzawm zel dawn tih a sawi bawk.

Iran senior cleric Ayatollah Ahmad Khatami chuan US leh Israel-in an ram an bei a nih vaih chuan an chhang let nghal dawn tih a sawi. Khatami chuan Tehran-a Eid puala ṭawngṭaina hun hmangtute hmaa thu a sawiah, US President Donald Trump nena inbiakna neih chu thil theih loh a ni tih a sawilang bawk.

"America chuan inbiakna neihna atana rawtna a siamte pawm turin min ti a, mahse hei hi inbiakna ni loin inrahbehna zawk a ni. Iran chuan min rahbeh tumtute chu a do let zel dawn a ni", a ti.

Iran Supreme Leader Ayatollah Ali Khameinei chuan Trump-an intiamkamna awm loa nuclear deal chungchanga inbiak a rawtna chu a hnawl a, America chuan inhmuh a duh a nih chuan a ṭha a, an duh loh anih pawhin pawi an tih loh thu a sawi.

Khatamai chuan Iran do chuan man sang tak an pek a ngai dawn tih sawiin, US leh a ṭhianṭha ber, Israel ram chu an bitum ve nghal dawn tih a sawi a ni.

US hi May 8 khan Iran leh world power ram parukten nuclear deal an siam, Joint Comprehensive Plan of Action (JCPOA) tia sawi aṭangin a inhnukdawk a, hemi hnu August 7 khan non-energy area-a Iran hrekna a siam ṭhar leh nghal a ni. Hei bakah hian November 5 hian energy, shipping leh port lama hrekna dang siam belh a tum bawk.