UN-in Kofi Annan hriatrengna hun hmang

United Nations chuan UN Secretary-General hlui Kofi Annan-a hriatrengna hun chu Nilaini khan New York-a UN headquarters-ah a buatsaih.

UN Secertary-General ni lai Antonio Guterres chuan Kofi Anna a ui thu sawiin, Annan-a uina thu ziahna bu siamah a ziak nghal bawk. Kofi Annan chu UN hlutna vawng nungtu leh, a thawhpuite nih pawh inchhuanpui tham a nih thu a sawi.

Guterres chuan, "Kofi Annan chuan ngaihdan thar ṭha tak tak vawrh chhuakin, UN chhungkuah mi thar a lalut ṭhin a ni. Kan hmalakna turte phur takin a sawi ṭhin a, UN in khawvel mipuite tana a hna thawhna kawngah a ti thei a ni tih rinna pawl chhung leh pawn lamah a tuh ṭhin a ni", a ti.

Mi hnuaihnung zawkte tana aw chhuahtu, hun khirh leh harsa tak hmachhawn lai pawha zam mai lo, dinhmun chhia leh harsa zawkte venhimna tura theihtawp chhuahtu a ni tiin Annan chu a sawi. Rorel thiam tak a nih bakah, a zaidamna, nelawmna te chu hriatreng a ni ang, a ti.

Kofi Annan hi kar kalta Inrinni khan Switzerland-ah kum 80 mi niin a thi a ni. Kum 10 chhung, kum 2006 thleng khan UN secretary-general dinhmun hi a chelh a ni.