IS hotuin an mi leh sate beidawng lo turin chah

Islamic State (IS) firfiak pawl hruaitu Abu Bakr al-Baghdadi chuan kum khat dawn hnuah thuchah tichhuakin, an mi leh sa te chu beidawng loa bei hram hram turin a chah.

Baghdadi-a thusawi record hi IS-a al-Furqan media group chuan a tichhuak a ni. IS hotu chuan pasalṭha, Muhajideen tan chuan hnehna leh tlawmna chu khawpui an lak zatah te, international missile leh smart bomb nei ṭha zawkah te teh tur a ni lo, tih a sawi. Mahse thusawitu hi Baghdadi a ni ngei em tih erawh finfiah theih a ni lo.

IS hian Islam ram din tuma an beihnaah Syria leh Iraq ram zau tak an la tawh a, mahse ram pahnih sipaiten beihpui an thlak hnuah an ram lak tam tak hi laklet sak an ni tawh a ni.

Baghdadi hian kum 2014 khan-a Iraq ram khawpui pawimawh Mosul an lak hnu khan khawvela Muslim zawng zawng chunga roreltu niin a inpuang a ni. Mahse Iraq sipaiten Mosul khawpui leh khaw dang tam tak IS kut aṭanga an laklet hnuah Baghdadi hi Iraq-Syria ramri velah a biru nia sawi a ni. IS hotu hi beihpui thlaknaah a thi tih leh, a hliam tia sawi a ni fo a, mahse a chin diktak hi hriat theih lohin a awm reng a ni. Nilainia thuchhuah a siam nia tarlan a nih avang hian a la dam ngei nia rin a ni a, mahse a awmna chin erawh hriat ala ni chuang lo.

Baghdadi chuan a thuchah tihchhuah tharah hian mahni sakhua theihnghilh a, hmelma te laka indona thianghlim kalpui lo a, siamtuin an laka a thil tiam theihnghilhte chu chak loh leh mualphona a ni tiin, mahse khitiang thil vawng nung tlattu erawh chu mi chak niin, eng hunah emaw hnehna changtu an la ni dawn a ni, a ti.