Australia PM aṭangin Malcolm Turnbull paihthla PM thar tur Scott Morrison

Australia Prime Minister aṭangin Malcolm Turnbull chu paihthlak a ni a, Scott Morrison-an a thlak dawn. Turnbull hi kum li chhunga Australia PM aṭanga paihthlak pali-na a ni.

Australia-a rorellai, Liberal Party chhungah Turnbull-a laka lungawi lo eng emaw zat an awm a ni. Kar hmasa khan party hruaitu thlannaah Turnbull hian a khingpui, home affairs minister hlui Peter Dutton a hneh. Mahse party hruaitu leh Australia PM dinhmun a chelh chhunzawm zel dawn avanga lungawi loin, senior minister ṭhenkhat chuan ban an tum thu an sawi a ni. Hei vang hian Turnbull chuan party hruaitu thlan ṭhat duha an pulut leh a nih chuan inthlan hi buatsaih ṭhat a remtih thu leh, amah chuan a chuh chhunzawm tawh lo tur thu a sawi bawk.

Hemi hnu hian party MP tam zawk chuan inthlan ṭhat an phut thu an sawi a, hei vang hian Turnbull chuan hruaitu a nihna aṭanga ban a remti ta a ni. Inthlan hi nimin khan buatsaih ṭhat niin, Turnbull aia ding, Scott Morrison chuan Peter Dutton leh forein minister Julie Bishop-te a hneh zui leh ta a ni.

Tourism Australia official hlui, Morrison hi kum 2007 khan Parliament member atan thlan tlin a ni a, ministerial portfolio pawimawh tak tak pathum a chelh tawh. Kum 1968, May 13-a piang Scott John Morrison hi Australia Prime Minister 30-na tur a ni. Turnbull-a kaihhruai sorkarah hian kum 2015, setpember thla khan Treasurer atan ruat a ni. Sakhaw zalenna humhalh duhtu niin, mahni anpui kawpte inneih phalna dan siam dodaltu lian tak a ni a, hei vang hian sawisel pawh a hlawh phah niin a sawi.