High level US-Russian talk nei

Geneva, Switzerland-ah Ningani khan high-level US-Russian talk neih a ni a, inbiak zawhah hian thuchhuah siam lo mah se ram pahnih aiawhte hian hmasawnna ṭha tak an neih thu an sawi.

Geneva-a inbiakna neihah hian US National Security Advisor John R. Bolton leh Russian Security Council Secretary-te Patrushev-te an tel a ni.

Meeting zawh hnuah US mission-a chanchin thar lakhawmtute a kawmnaah, Bolton chuan hmasawnna an neih thu sawiin, communication line lamah thawhdunna pawh siamṭhat leh theih a nih thu te a sawi. He meeting-ah hian thil chi hrang hrang an sawidun thu a sawi a, heng zingah hian firfiak beih let dan te, dan loa pem lut chungchang te, cyberspace bakah Syria, Middle East, Afghanistan leh Ukraine chungchangte an sawidun a ni.

Bolton chuan Russia hruaitu hnenah hian US mid term election neih tura Russia inrawlh lo tura a hrilh lawk thu a sawi. US chuan inthlana ram dang inrawlh tum chu a ngaihzam mai dawn loh thu leh, a theih anga inveng tura hma a lak tur thu pawh a sawi bawk.

Ningani-a meeting hi darkar nga chuan neih a ni a, hei hi July thlaa President Vladimir Putin leh President Donald Trump ten Helsinki-a summit an neih hnuah ram pahnih aiawhten inbiakna an neih lehna hmasa ber a ni.