SKorea Presiden hlui hremna pawtsei

South Korea appeal court chuan an ram President hlui Park Geun-Hye-i hremna chu kum khat atan a pawhsei sak.

Park Geun-Hye-i hi eiruk thubuai leh president a nih laia dik lo taka a thuneihna hmanga puhna thubuaiah thiam loh chantirin kum 24 tang tura hrem a lo ni tawh a ni. Mahse prosecutor-te chuan president hlui hremna hi kum 30-a pawhsei turin an appeal a, an ngenna hi appeal court chuan a ngaihtuah hnuah kum khat dang a pawhsei sak a, kum 25 a tang dawn ta a ni.

Park-i hi president hlui a nih laiin sumdawng liante hnen aṭanga dollar maktaduai 20 chuang dawngah puh a ni a, hei bakah hian a ṭhianṭha Choi Soon-sil-i hnenah ram thurukte hrilhah puh a ni bawk. Amah sawiseltu official-te pawh a ban nia sawi a ni bawk. Thubuai siamsak a nih hnuah hian President a nihna aṭangin paihthlak a ni a, a thubuai hi thla 10 chhung ngaihtuah a nih hnuin kumin April thla khan thiam loh chantir a ni.

Nimina appeal court-in a chungthu a ngaihtuahnaah hian Park-i hi inlan lo a, court rorel chu a boycott thu sawiin, a laka ro rel a nih danah politics inrawlhah a puh. Court building bulah hian amah thlawptu mi eng emaw zat an pungkhawm a, Parki-i chu chhuah zalen tura an phut thu leh, leftist Communist sorkar chu bang tura an phut thute an aupui.