Hawaii-a thlipui tleh tur vangin emergency puang

US President Donald Trump chuan Hawaii-a thlipui, Hurricane Lane a tleh dawn vangin Ningani khan state of emergency a lo puang lawk.

National Weather Service chuan Hurricane Lane hian thlipui na tak, darkar khata mel 130-naa tleh thei a ni tih an sawi a, mahse Hawaii thliarkar a thlen chuan a tleh nat lam hi a tlakhniam hman beisei a ni. Thlipui hian ruahtui a kentel avangin leimin leh tuilian bawhawk pawh a siam thei dawn a, hei hian inkalpawhna kawngte pawh a tichhe thei dawn niin an sawi.

Hawaii-ah hian Ningani khan ruah centimetre 30-a tam a sur tawh a, thuneitute chuan ni li ni nga chhung vel chu a la sur chhunzawm dawn niin an sawi. Emergency team chuan evacuation centre 16 an siam tawh a, US Coast Guard chuan Hawaii-ah hian chhiatna a thlen palh thuta chhanchhuah hna thawk turin US sipai 57,000 dah an ni tih a sawi. President Trump chuan Hawaii mipuite chu a chhe ber thleng thei tur laka lo inbuatsaih turin a chah bawk.