Haiti President thah thubuaiah senotor hlui man

Jamaica rama thuneitute chuan Haiti president Jovenel Moise thah thubuaia rinhlelh kai berte zinga mi, Haiti senator hlui John Joel Joseph an man tih Jamaica national police te chuan an sawi.

Jamaica Constabulary Force thupuangtu Dennis Brooks chuan Haiti-a politician hriat hlawh tak, Joel Joseph hi kar liam ta Zirtawpni khan man a ni tih a sawi a ni. Brooks hian tualthahna chhuitu, US Federal Bureau of Investigation ngenna anga man an nih leh nih loh chungchang erawh a sawilang lo thung.

Hetih lai hian Jamaica police superintendent Stephanie Lindsay chuan Joseph rual hian midang pawh man an nih thu leh an mi mante hi an chhungkhat laina hnaite an nih leh nih loh finfiah tumin thuneitute chuan hma an la mek tih a sawi. "Thil tam tak inthupru a awm avangin chanchin kimchang zawk kan la sawi thei lo a ni," a ti.

Moise an thah hlima prime minister lailawk atana ruat, Haiti foreign affairs minister hlui Claude Joseph chuan misual an man thei chu lawmawm a tih thu sawiin, "John Joel Joseph an man avanga chiang taka lang chu inthahnaa mawhphurtu emaw inhnamhnawihna hrim hrim nei emaw tan birukna tur hmun a awm tawh lo tih a lantir a ni," tiin a twitter-ah a tarlang.

Joseph hi president Moise thattu rinhleh thua an man pahnihna a ni. Nikum October khan Jamaica thuneitute chuan Colombia sipai hlui Mario Antonio Palacios chu an lo man tawh bawk.

Assault rifle nena inthuam assassin-te chuan nikum July 7 khan Port-au-Prince-a Moise chenna chu luhchilhin an kaphlum a ni. Moise thahna thleng vang hian Latin America leh Caribbean ramah hian tualthattu zawn hna chu ngawrh taka kalpui zui a ni. Mi 40 chuang, an zingah hian Colombia sipai hlui 18 te chu inbeihnaa inhnamhnawihna an neih avangin an man tawh. Colombia sorkar official-te chuan sipai bang zinga a tam zawk chu bumin an awm a, an hnathawh tak tak pawh an hriat loh thu an sawi.